६ वर्षदेखि उठेन शिक्षण अस्पतालमा रहेका गाेरखालीकाे शव

आइतवार, भदौ २८, २०७७

भदाै २८, काठमाडौं । माओवादी द्वन्द्वकालमा विद्रोही पक्षबाट मारिएका छोरा कृष्णप्रसाद अधिकारीका हत्यारालाई कारबाहीको माग राख्दै  वीर अस्पतालमा अनसनमै रहेका बेला निधन भएका गाेरखाका नन्दप्रसाद अधिकारकाे शव ६ वर्षदेखि शिक्षण अस्पतालमा रहेको छ । उनकाे ६ असाेज २०७१ मा निधन भएकाे थियाे ।

सँगै अनसन बसेकी उनकी श्रीमती गंगामाया अधिकारी भने वीर अस्पतालमा ‘डेरा’ जमाएर बसेकी छन् । उनी पतिसँगै अस्पतालमा रहेकाे र पतिकाे निधन पछि पनि वीर अस्पतालमा बस्दै आएकी छन् । अस्पतालमा बस्न थालेकाे ९ वर्ष बितिसक्यो ।

गंगामायाले पछिल्लोपटक २०७५ असार २९ मा अनसन तोडेकी थिइन् । तर, अन्त जाने ठाउँ नभएको भन्दै उनी ०७५ सालदेखि नै वीर अस्पतालको स्टाफ वार्डको क्याबिन नम्बर ७ मा बस्दै आएकी छिन् ।

यही बीचमा सरकारले वीर अस्पतालमा कोभिडका बिरामीहरु राख्ने निर्णय गरेपछि गंगामाया समस्यामा परेकी छन् । ‘म वीर अस्पताल कुरेर बसेको ९ वर्ष भयो, आज निस्किएर कहाँ जाने ? उनले भनिन्, कोठासोठा भए बस्नुस् भन्नुभयो, । तर, मेरो कोठा छैन ।’आफ्नो एउटा छोराको हत्या भएको र अर्को छोरो जेलमा रहेको बताउँदै उनले भनिन्, अब म कहाँ जाऊँ ?’

अस्पताल प्रशासनले वीरका अरु बिरामीलाई सारेको ट्रमा सेन्टरको सातौं तलामा बस्न गंगामायालाई सुझाएको छ । तर, गंगामायाले समूहमा नबस्ने भन्दै क्याबिनमा बस्न चाहेकी छन् । तर, ट्रमामा क्याबिन नरहेको अस्पताल प्रशासन बताउँछ । स्राेत अनलाइनखबर