आज नेकपा माओवादी केन्द्रकाे वडा सम्मेलन,निर्वाचनबाट नयाँ नेतृत्व चयन हुने

शनिबार, मंसिर ४, २०७८

 मंसिर,४ गाेरखा । नेकपा माओवादी केन्द्रले शनिवार एकै दिन ६ हजार ७४३ वडामा नेतृत्व चयन गर्दैछ । गाेरखा जिल्लाकाे ९४ वडामा पनि आजै नेतृत्व चयन हुनेछन् । जिल्लाका २३ हजार भन्दा धेरै पार्टी सदस्यहरुले निर्वाचन प्रक्रियाबाट नेतृत्व चयन गर्न लागेका हुन् । कम्युनिष्ट पार्टीकाे ७२ वर्ष लामाे इतिहासमा पहिलाे पटक तल्लाे तहबाट नै निर्वाचन प्रक्रियाबाट नेतृत्व चयन हुन लागेकाे नेकपा माओवादी केन्द्र गाेरखा जिल्ला सँयाेजक लेख बहादुर थापाले बताए ।

पार्टीमा जसले काम गर्न सक्ने क्षमता राख्छ उसलाइ निर्वाचनमा मतदान गर्न थापाले सुझाए । जिल्लाकाे धार्चे गाउँपालिका वडा नम्बर ३ मा शुक्रबार नै समिति चयन भएकाे छ । सम्भवत : नेपालमै प्रथम वडा सम्मेलन भएकाे साे क्षेत्रका नेकपा माओवादी केन्द्रका कार्यकर्ताहरुकाे भनाइ छ ।

पुस ११ गतेदेखि १३ गतेसम्म काठमाडौंमा हुने राष्ट्रिय सम्मेलन अन्तर्गत शनिबार वडा सम्मेलन हुन लागेको हो । सर्वसम्मत नेतृत्व चयन गर्न नसके निर्वाचनमा जान पार्टी केन्द्रले निर्देशन दिएको छ ।

पार्टीले केन्द्र बाहेकमा तीन चरणमा सम्मेलन गर्ने निर्णय गरेको छ । जसअनुसार वडा सम्मेलनपछि यही मंसिर ११ गते पालिका तथा नगर सम्मेलन र २५ गते प्रदेश सम्मेलन सम्पन्न हुने केन्द्रीय निर्वाचन आयोगका प्रमुख विष्णुपुकार श्रेष्ठले जानकारी दिए ।

वडादेखि केन्द्रीय तहसम्म निर्वाचन प्रक्रिया पूरा हुँदा सो पार्टीका तीन लाख कार्यकर्ताले कम्तीमा एउटा पदीय जिम्मेवारी पाउनेछन् भने आठ हजारभन्दा धेरै समिति गठन हुनेछन् ।

वडादेखि केन्द्रसम्म सर्वसम्मत वा निर्वाचन प्रक्रियाबाट नेतृत्व चयन गर्ने योजनाअनुसार बनेको केन्द्रीय निर्वाचन आयोगले ७७ जिल्ला तथा सातवटा प्रदेशमा निर्वाचन समिति बनाएर आफ्नो काम गरिरहेको छ । निर्वाचन समितिमा रहने सदस्यलाई सो आयोगले तालिम तथा प्रशिक्षण दिएर देशभर खटाएको छ ।

राष्ट्रिय सम्मेलनको तयारी अन्तर्गत माओवादी केन्द्रले पार्टी सदस्यता वितरण तथा नवीकरण पनि टुंगो लगाएको छ । निर्वाचन आयोगका प्रमुख श्रेष्ठले पार्टी सदस्य करिब ८ लाख पुगेको जनाएका छन् ।

समाजकाे विकासका लागि राजनैतिक शक्तीलाइ बलियाे शक्तिका रुपमा विश्वभरी मान्यता दिने प्रचलन रहेकाे छ ।