संस्कृति, पर्यटन तथा नागरिक उड्यनमन्त्री सुदन किरातीको अगुवाइमा मनकामना मन्दिर परिसर सरसफाइ

गोरखा, २४ असोज  । संस्कृति, पर्यटन तथा नागरिक उड्यनमन्त्री सुदन किरातीको अगुवाइमा आज विहान गोरखाको प्रसिद्ध धार्मिकस्थल मनकामना मन्दिर परिसरकाे सरसफाई गरिएको छ । मनकामना मन्दिरको सरसफाईमा सहभागी हुन उनी मंगलबार साँझ गोरखा आएका थिए ।

मन्त्री किरातीको अगुवाइमा मनकामना मन्दिर र आसपासका क्षेत्रमा रहेका फोहोर संकलन गरी व्यवस्थापन गरिएको हो । मन्दिर सरसफाई कार्यक्रममा मन्त्री किराँती सहित मनकामना क्षेत्रका स्थानीयबासीहरु, बिभिन्न संघसंस्थाका प्रतिनिधिहरुको समेत उल्लेख्य सहभागीता रहेको नेकपा माओवादी केन्द्र गोरखा जिल्लाका संयोजक दीपक तिमल्सिनाले जानकारी दिए ।

मन्दिर सरसफाई कार्यक्रममा प्रतिनिधिसभाका सांसद उर्मिला माझी, सहिद लखन गाउँपालिकाका अध्यक्ष रमेशबाबु थापा मगर, सहिद लखन गाउँपालिकाकी उपाध्यक्ष इन्दिरा तिवारी लगायतको पनि सहभागिता रहेको थियो ।

मनकामनाको दर्शनले मनोकांक्षा पूरा हुने धार्मिक विश्वास भएकाले यहाँ भक्तजनको वर्षभरी नै भिड लाग्ने गर्दछ । मन्दिरमा भाकल चढाउन मन्दिरमा हजारौं भक्तजनहरु पूजा गर्न, बली चढाउन, परेवा उडाउन वर्षेनी यहाँ पुग्ने गर्दछन् ।

गोरखाको शहीद लखन गाउँपालिका वडा नम्बर २ र ३ मा पर्ने मनकामना मन्दिर नेपालकै एक महत्वपूर्ण धार्मिक तथा पर्यटकीय तीर्थस्थलका रुपमा प्रख्यात रहेको पाइन्छ । यस मन्दिरमा दर्शन गरेमा मनले चिताएको पुग्ने जनविश्वास रहेकै कारण परापूर्वकालदेखि मन्दिरको नाम नै मनकामना रहन गएको हो भन्ने जनविश्वास छ ।

मनकामना मन्दिरमा पर्यटकहरु समेत केबलकार चढेर यस पवित्र मन्दिरको दर्शन र त्यस क्षेत्रबाट दृष्यावलोकनका लागि मन्दिरमा पुग्ने गर्दछन् । समुद्री सतहदेखि १ हजार ३०३ मिटरको उचाईमा अवस्थित यो मन्दिरको परिसरबाट दक्षिणतर्फ महाभारत लेक र छिम्केश्वरी डाँडाका साथै उत्तरी भागमा अन्नपुर्ण हिमाल र मनास्लु हिमालका चुचुराहरु देख्न सकिन्छ ।

मन्दिरकाे दर्शनका लागि वर्षाेनी १५ लाख भन्दा धेरै भक्तजनहरु आउने गर्दछन् ।