गाेरखा । गोरखाको भीमसेन थापा गाउँपालिका–६, अश्राङमा रहेको श्री नवजागृति चण्डी माध्यामिक विद्यालयमा कम्युटर इन्जिनियरिङ्ग बिषयको पठनपाठन सुरु हुने भएको छ ।
गाउँपालिकाको बिशेष पहलमा नेपाल सरकार शिक्षा विज्ञान तथा प्रबिधि मन्त्रालय शिक्षा तथा मानव स्रोत विकास केन्द्रले विद्यालयलाइ प्राविधिक धार सञ्चालनका लागि अनुमति प्रदान गरेको हो ।
शैक्षिक क्षेत्रको स्तरोन्नतिसंगै प्राविधिक शिक्षाको बिकास मार्फत शिक्षालाई रोजगारमूलक बनाउने तर्फ जोडदिदैँ आएको गाउँपालिकाले पालिका भित्रका विद्यालय पहिलो पटक कम्युटर इन्जिनियरिङ्ग बिषयको अध्यापन अनुमति लिन सफल भएको हो । विद्यालयले अध्यापन अनुमति पाएसंगै शैक्षिकसत्र २०८० देखि नै प्राविधिक धार तर्फ कक्षा ९देखि १२ सम्म कम्युटर इन्जिनियरिङ्गको पठनपाठन सुरु हुने गाउँपालिका अध्यक्ष लोकप्रसाद बन्जराले जानकारी दिए ।
२०७९ चैत २९ गतेको मन्त्रिस्तरीय निर्णयबाट उक्त विद्यालयलाइ कम्युटर इन्जिनियरिङ्ग अध्यापनको अनुमति दिने निर्णय गरेको थियो । विद्यालयमा कक्षा सञ्चालनका लागि अनुदान समेत सरकारले उपलब्ध गराउनेछ । यस अघि गत शैक्षिक सत्रदेखि नै गाउँपालिकाको वडा नम्बर ७ बोर्लाङ्ग स्थित श्री सरस्वती माध्यामिक विद्यालयमा तीन बर्षे डिप्पोमा इन सिभिल इन्जिनियरिङ्ग विषयमा पठनपाठन सुरु भइसकेको छ ।