पोखरा । पोखरामा यही मङ्सिर १७ देखि नेपाल मणिपाल अस्पताल ३४ औँ राष्ट्रिय औद्योगिक व्यापार मेला तथा १३ औँ क्यान इन्फोटेक–२०८२ हुने भएको छ । पोखरा उद्योग वाणिज्य सङ्घको आयोजनामा पोखरा प्रदर्शनी केन्द्र, नयाँ बजारमा ६ दिन उक्त मेला हुने भएको आज (मङ्गलवार) पोखरामा आयोजित पत्रकार सम्मेलनमा जानकारी गराइएको हो ।
जेनजी आन्दोलन पछि प्रभावित भएको पोखरा क्षेत्रको उद्योग व्यवसायलाई थप प्रभावकारी र चलायमान बनाउन यस वर्ष पनि उक्त मेला आयोजना गरिएको सङ्घका अध्यक्ष तथा मेलाका संयोजक गोकर्ण कार्कीले बताउनु भयो । महोत्सवमा डोम तर्फ ७८ सहित करिब १ सय २० वटा मात्र विभिन्न व्यवसायीक तथा व्यापारिक एवं सेवामूलक तथा सूचनामूलक स्टलहरू रहने भएको उहाँले जनाउनु भयो । पोखरा पर्यटनको राजधानी भएकोले उहाँको पर्यटन क्षेत्र चलायमान नहुँदासम्म यहाँको आर्थिक गतिविधि प्राय ठप्प जस्तै हुने कार्कीले जनाउनु भयो ।
यो वर्षको मेलामा पोखराकै प्रतिष्ठित नेपाल मणिपाल शिक्षण अस्पताल मुख्य प्रायोजकको रूपमा आबद्ध भएको छ । मेलामा औद्योगिक उत्पादन, कृषि–कृषिजन्य सामग्री, हस्तकला, सूचना–प्रविधि उपकरण, घरायसी तथा दैनिक उपभोग्य सामग्रीको प्रदर्शनी–बिक्री हुनेछ । क्यान इन्फोटेक समाहित भएकाले नवीनतम डिजिटल प्रविधि, सफ्टवेयर, ग्याजेट र नवप्रवर्तनका सामग्री मुख्य आकर्षण हुनेछन्।
गण्डकी क्षेत्रका परम्परागत कला–संस्कृतिलाई संरक्षण र प्रवर्द्धन गर्ने उद्देश्यले यसपटक मेलामा स्थानीय सांस्कृतिक प्रस्तुति समावेश गरिएको बरिष्ठ उपाध्यक्ष उत्तममान बुद्धाचार्यले बताउनु भयो । प्रवेश निःशुल्क रहने मेला अन्तर्गत विभिन्न विषयमा परिसंवाद, लगानी मैत्री नीतिबारे छलफल, उद्यमशीलता तथा नवप्रवर्तनसम्बन्धी कार्यक्रम पनि हुने भएको छ । उक्त मेलाबाट करिब ५० लाख रुपैयाँ आम्दानी र ४५ लाख खर्च हुने अनुमान गरिएको छ ।
पोखरा महानगरपालिकाले प्रदर्शनी केन्द्रभित्र अपसाइक्लिङ तथा रि–साइक्लिङ पूर्वाधार निर्माण गरिरहेको हुँदा प्रदर्शनी स्थल केही सङ्कुचित बनेको र यही कारण मेलाको अवधि र स्टल सङ्ख्या घटाइएको महासचिव शोभा गौतमले बताउनु भयो । निर्माण सम्पन्न भई प्रदर्शनी केन्द्रको व्यवस्थापन पुनः सङ्घलाई प्राप्त भएपछि आगामी वर्ष स्टल सङ्ख्या तथा अवधिमा वृद्धि हुने उहाँले बताउनु भयो ।
मेलामा कम्प्युटर एसोसिएसन नेपाल महासङ्घ क्यान–कास्की सह–आयोजकका रूपमा रहनेछ भने गण्डकी प्रदेश सरकार, पोखरा महानगरपालिका तथा नेपाल पर्यटन बोर्ड (गण्डकी) प्रवर्द्धकका भूमिकामा रहनेछ ।