मुक्तक-१
तिम्रो होस्टे मेरो हैसे लेख्दालेख्दै गीत बन्यो
तिम्रै यादमा खसे मोती सिरानीमा शीत बन्यो
कहाँबाट सुरु भयो कहाँ पुगि अन्त्य होला?
शब्दसँग खेल्दाखेल्दै दुई अक्षरको प्रीत बन्यो!
मुक्तक-२
सिरेटोले सेकिरहँदा बोलीमा न्यानो घाम आउँदैन भने
केका लागि साँचिराख्नु अफ्ठ्यारोमा काम आउँदैन भने
यस्ता बनावटी सम्बन्ध जोगाउनु भन्दा त मास्नु नै जाती
जटिल अवस्थामा सहानुभूतिको खाम आउँदैन भने!!
मुक्तक-३
भित्र सामान जस्तो होस् आकर्षक त खोल देखिन्छ
तेलको चाहना भएपछि सपनामा पनि कोल देखिन्छ
अस्वस्थ आलोचना गरेर उचाइ खोज्नेहरूले बुझ्नु
खासमा साँघुरो दृष्टिकोणबाट सानै भूगोल देखिन्छ!
मुक्तक-४
आउने सबै समस्यासँग भिड्ने बानी छ
बाटो छेक्ने तगाराहरू गिँड्ने बानी छ
नदेखाउनु कुनै डर कमजोर सोचेर कसैले
सिसामाथि खाली खुट्टा हिँड्ने बानी छ!!
मुक्तक-५
केही अधुरा होलान् तर केही भने पूरा पक्कै छ्न्
कुनै हातमा चुरा छन्छन् कुनै हातमा छुरा पक्कै छन्
नजिक हुनुको मतलब कहाँ हो र सबै बिर्सनु पनि
दृष्टि साँघुरा हैनन् बिचमा निषेधित कुरा पक्कै छन्! मिना चौलागाईं काभ्रे- पाँचखाल
