भदौ ४ ,अछाम। जिल्लाकाे रामारोशन गाउँपालिका–५ मा कैलाश खोलाको बाढीले स्थानीय सैनीबजार बगाउँदा बेपत्ता भएका ११ जना खाेजि कार्य जारी रहेकाे छ ।
बुधवार बिहान १ बजे कैलाश खोलामा आएको बाढीले बस्ती बगाउँदा १७ जना बेपत्ता भएका थिए । तीमध्ये ६ जनाको शव बुधबार साँझसम्म भेटिएको थियो । अझै ११ जना बेपत्ता रहेको र उनीहरुको खोजी भइरहेको जिल्ला प्रहरी कार्यालय अछामले जनाएको छ ।
प्रमुख जिल्ला अधिकारी गोकर्ण प्रसाद उपाध्यायले बाढीले बेपत्ता परेकाहरु तल्लो तटीय क्षेत्रमा पुगेको हुन सक्ने अनुमान गरे । उनले भने ‘अहिले खोजीका लागि डोटी र कैलाली जिल्लामा समेत समन्वय भइरहेको छ ।’
जिल्ला प्रशासन कार्यालयका अनुसार न्यूनतम २२ घरधुरी बाढीले बगाएको छ । ९ ओटा झोलुङ्गे पुलमा र ५ लघु जलविद्युत आयोजनामा समेत क्षति पुगेको छ ।
‘४ मोटरसाइकल, एउटा एम्बुलेन्स र २ ओटा साना गाडीसमेत बाढीले बगाएको छ,’ प्रजिअ उपाध्यायले भने, ‘ठूलो संख्यामा पशु चौपाया पनि बगाएको जानकारी प्राप्त भएको छ ।’
३ जनाको सनाखत
प्रहरी नायव उपरीक्षक थापाका अनुसार अछाम रामारोशन गाउँपालिका ४ का १२ वर्षीय नवीन साउद, वडा नम्बर ५ का अन्दाजी ३३ वर्षीय गौरी शाह र चन्द्र साउद मृत अवस्थामा फेला परेका थिए । अन्य तीन जनाको अझै सनाखत हुन नसकेको उनले जानकारी दिए ।
मृतक नवीन साउदको शव परिवारलाई बुझाइएको छ भने ५ जनाको शव जिल्ला अस्पताल अछामको शव गृहमा राखिएको छ । उच्च जोखिममा रहेका १७ परिवारका करिब ७० जनालाई सुरक्षित स्थानमा स्थानान्तरण गरिएको छ । उनीहरूलाई हाल मेल्लेख गाउँपालिका वडा नम्बर ५ स्थित नन्दा देवी आधारभूत विद्यालय र कैलेस्वरी प्राविमा राखिएको डिएसपी थापाले बताए ।
यो खबर पढेर तपाईलाई कस्तो महसुस भयो ?
खुसी
दुःखी
अचम्मित
उत्साहित
आक्रोशित
