गोरखा । जिल्लाकाे भीमसेन थापा गाउँपालिकाले पालिका भित्रका नागरिकहरुलाई व्यक्तिगत घटना दर्ता घरैबाट गर्नसक्ने गरी व्यवस्था मिलाएको छ । गाउँपालिकाले चालु आर्थिक बर्ष २०८०/०८१ देखि गाउँपालिका भित्रका सवै नागरिकहरुले घरमै बसेर अनलाईन मार्फत व्यक्तिगत घटना दर्ता गर्नसक्ने व्यवस्था गरेको हो ।
जन्म, मृत्यु, बसाईसराई, विवाह, सम्बन्ध बिच्छेदका घटना अब अनलाईन मार्फत सुरु गरिएको गाउँपालिकाका अध्यक्ष लोकप्रसाद बन्जराले बताए । यस्ता कामका लागि वडा कार्यालयमा धाउनु पर्ने बाध्यतालाई अन्त्य गर्ने उद्वेश्यका साथ अनलाईन सुरु गरिएको उनले बताए ।
घटना दर्ताका लागि मोवाईल वा कम्युटर मार्फत विवरण अनलाइन फारम भर्न सकिने गाउँपालिकाले जनाएको छ । भौगोलिक हिसावले जटिल रहेको भीमसेन थापा गाउँपालिका भित्रका केही वडाहरुमा कार्यालयसम्म पुग्न पनि घण्टौ हिड्नुपर्ने अबस्था रहेकाले नागरिकहरुलाई घरघरमा सेवा पुरर्याउन घटना दर्ता अनलाईन माध्यमबाट गर्न सुरु गरिएको हो ।
बसाईसराई नभएका तर गाउँ छोडेर अन्यत्र बसोबास गर्दै आएका नागरिकहरुका लागि पनि यसले घटना दर्ताका लागि सहज हुने गाउँपालिकाले अनुमान गरेको छ । अनलाईन मार्फत घटना दर्ताका गरेपछि सेवाग्राहीले टोकन प्राप्त गर्ने र सम्बन्धित वडा कार्यालय मार्फत घटना दर्ता प्रमाण पत्र उपलब्ध गराउने व्यवस्था गरिएको छ । अनलाईन फारम भर्नका लागि वेबसाइट र क्युआर कोड दुवै प्रयोगमा ल्याइएको छ ।
